febrúar 2004

You are currently browsing the monthly archive for febrúar 2004.

KA bikarmeistarar 2004!!

29. febrúar 2004 in Handbolti | No comments

Þetta var bara góður leikur hjá KA og Fram í höllinni í gær, boltinn hraður og skemmtilegur. Ég vil óska öllum félögum mínum innilega til hamingju með sigurinn þetta var flott hjá ykkur!

Arnar Þór þetta var flottur leikur hjá þér líka þú varst bara óheppinn með lið að þessu sinni :)

Þreyttara gerðu í buxurnar á móti ÍR2 í dag og það stórt…hef ekki tapað svona stórt síðan ég byrjaði að æfa handbolta. En það kemur dagur eftir þennan dag, við höfðum þó gaman að þessu mest allan tíman. Meira seinna….

Tags: ,

KA-Fram í dag í höllinni!!

28. febrúar 2004 in Handbolti | No comments

Það verður enginn smá leikur í dag í Laugardalshöllinni þegar mínir menn í KA koma og etja kappi við Adda Sæ og Petja fyrrum KA-menn en þeir heita víst Frammarar í dag. Þetta verða hörkuátök og mikið að gerast inn á línunni þar sem verður eflaust hart barist. Ég er í vinnunni núna en ég ætla að drífa mig um leið og ég get og hvetja mína menn

ÁFRAM KA!!

Tags:

Naglbítarnir klikka ekki!

27. febrúar 2004 in BS-nám, Handbolti | No comments

Ég, Birkir og Björgvin fórum á helvíti netta tónleika í gær á Gauknum en þar voru 200.000 naglbítar að spila. Þeir voru bara djöfulli góðir að mínu mati í afbragðs formi þessa dagana. Þeir eru að fara að spila á Samfés í kvöld og vonandi gengur þeim eins vel þar og í gærkvöldi.

Dagurinn í dag hjá mér byrjar annars bara nokkuð rólega, ég ætla að fara í frumulíffræði kl. 9:30 og fara svo í ræktina. Síðan þegar ég er búinn að taka rosalega á því þar þá ætla ég að klára örverufræðiskýrslur og lífefnafræðiskýrslur. Kvöldið verður svo rólegt að ég held…horft á American idol og eitthvað.

Á morgun er svo vinna fram að bikarleiknum þar sem KA spilar við FRAM. Gaman verður að sjá Arnar Þór klást við gömlu félagana á línunni og vonandi eigum við eftir að sjá fjörugan leik þar sem engu verður til sparað. Nú nú…ekki var það mikið fleira í fréttum að sinni, ég vona að þið eigið góðan dag og ljúfa helgi.

ps. þeir sem að vita ekkert um Naglbítana ættu að kíkja á síðuna þeirra, smella hér til þess og ég lofa ykkur að þið finnið eitthvað áhugavert! Þó það væri ekki nema flott föt sem hægt er að panta á síðunni þeirra á vægu verði.

Tags: ,

Sprengidagur

24. febrúar 2004 in Blog, Íþróttir | No comments

Já og ég sko búinn að borða mikið af saltkjöti og baunum. Reyndar grunar mig að þetta hafi verið aðeins of salt því ég held ég sé búinn með ein 4-5 stór vatnsglös núna nokkrum tímum síðar. Gott var það alla vega þó það sé ekki alveg það hollasta en ætli það drepi mann að borða þetta örfáu sinnum á ári, nei held ekki.

Ég fór í ræktina eftir skóla í dag eins og ég gerði reyndar líka í gær og var tekið heldur betur á því. Í dag var bekkpressu dagur og því tekið hraustlega á því, maður er svo sem ekki kominn með neinar rosalegar þyngdir strax en það á eftir að koma fljótlega með þessu áfram haldi. Svona átök voru gamlar konur á eftirlaunum greinilega hrifnar af því þær gjörsamlega góndu á mig þegar ég var hér um bil farinn að öskra í sumum tækjunum. Var sem sagt bara nokkuð sáttur með daginn í ræktinni og þyngdist um nokkur kíló af sjálfsáliti þó svo að vigtin inn í klefa sýndi svipaða tölu og síðast…hún mælir hins vegar bara líkamsþyngd en ekki sjálfsálitið sem sveif í kring um mig eftit að hafa sett pinnan neðar í þyngri lóð í öllum tækjunum sem ég fór í í dag. Hvort það var vegna þess að gömlu konurnar í salnum voru flestar háaldraðar og bara í upphitunarþyngdunum eða ég að bæta mig veit ég ekki…en það var alla vega góð tilfining! :)

Gaman væri nú að taka sig almennilega á og komast í gott form áður en sumarið kemur, því það er nú ekk mjög líklegt að maður nenni að hanga inni og lyfta þá. Þar sem veturinn er búinn að vera mjög snjósamur eða a.m.k. á köflum, þá ætla ég að gerast svo djarfur að spá góðu veðri í sumar og munum við sjá mikið af berjum í ágúst.

Tags: ,

Fínt að skreppa aðeins norður…

23. febrúar 2004 in Blog | No comments

Kom í gær heim í Vesturbergið eftir að hafa verið fyrir norðan um helgina. Þetta var ágætis ferð, allt of stutt reyndar þar sem við komum frekar seint á föstudaginn til Akureyrar og lögðum frekar snemma af stað á sunnudaginn heim aftur.

En þetta var alveg helvíti góður laugardagur, ótrúlega afslappandi að koma til Akureyrar. Ef maður þarf að gera eitthvað tekur það minni tíma að framkvæma það heldur en bara að hugsa hvernig í fjandanum manni eigi að takast það hérna fyrir sunnan. Alltaf eitthvað bras, hvort maður hafi bílinn og hvenær maður þurfi að vera búinn að skila honum og ég tala nú ekki um ef maður ætlar að taka strætó þá er það nú bara vika í skipulagningu ;)

Ég held að bolludagurinn í ár hafi verið með þeim betri í mörg ár…eða er maður bara svona fljótur að gleyma? Þetta er reyndar enginn bolludagur, því þetta er bolluhelgi hjá mér og minni fjölskyldu. Amma dældi alveg í mig gómsætust bollum sem ég hef smakkað lengi…örugglega í svona ár eða eitthvað :=) Síðan var dagurinn í dag góður líka því Kolla bakaði ágætis bollur sem við settum karmelubúðing, rjóma og súkkulaðikrem á og Brynja tengdó kom með bollur úr vinnunni.

Jæja nóg í bili…hvernig voru bollurnar ykkar?

Tags: ,

Já þetta var alveg hörmulegur dagur!

21. febrúar 2004 in Blog | No comments

Já þessi dagur var greinilega ekki sá besti hjá mér, því að þó að ég endaði síðasta póst að dagurinn hefði verið ágætur síðan ég komst loksins í skólann þá stóð sá góði hluti ekki lengi.

Ég hélt af stað Norður með Kollu, Brynju mömmu hennar og Tóta sem er kærasti mömmu Kollu, um hálf þrjú leytið. Við vorum kominn heim til Akureyrar um svona hálftólf leytið og vorum því níu tíma á leiðinni. Við lentum í hræðilegum hlutum á leiðinni því við komum að bílslysi í Borgarfirðinum þar sem tvær 14 ára stelpur létust. Blessuð sé minnig þeirra.

Þetta slys gerðist á flughálum kafla á milli Baulu og Hreðavatnsskála. Við komum mjög snemma að slysinu og var fólkið sem kom á undan okkur rétt byrjað að átta sig á aðstæðum og ekki búið að hringja í neyðarlínuna. Tóti hringdi því og bað strax um hjálp en allt kom fyrir ekki, höggið af árekstrinum var svo þungt að stelpurnar létust þó svo að allt væri reynt að gera fyrir þær. Þetta var alveg hörmulegt slys og vil ég biðja alla um að sína varkárni í umferðinni, keyra eftir aðstæðum því mínúturnar skipta ekki svona miklu máli. Það er alveg ótrúlega stutt á milli lífs og dauða og veltir maður því óneitanlega fyrir sér hversu nálægur þessi árekstur var manni. Þetta hefði alveg eins getað verið við.

Eftir þriggja tíma stopp vegna þessa slyss þá var vegurinn opnaður að nýju og við héldum áfram, ömurlegt veður var á leiðinni. Einna verst var það á heiðunum þar sem rétt sást í næstu stykur og þurftum við því að keyra á 20 km hraða á smá kafla þar sem hríðin var dimmust. Fyrir rest komumst við þó til Akureyrar…ég fékk mér slátur sem amma hafði sent mér og stöppu og fór beint að sofa. Þessi dagur var alveg rosalegur og tók mikið á mig.

Hérna á Akureyri er fallegt veður í dag, þó er búið að taka upp næstum allan snjóinn sem kom hér fyrir tveimur vikum þannig að það verður lítið farið á bretti í þessari ferð. Ég er búinn að fara í bollukaffi til ömmu…þær klikka ekki hjá henni, raðaði í mig fjórum stykkjum áðan beint eftir hádegismatinn…hefði borðað meira af þeim ef ég hefði ekki verið búinn að slavra í mig KEA skyri með sláturssneið ;)

Það spurning að fara að lesa smá núna í skólabókunum og fara svo í Sjallann í kvöld á Skímó….

Tags: , ,

One of these days!!!

20. febrúar 2004 in Blog | No comments

Við Þreyttarar tókum okkur saman í andlitinu í gær og sigruðum lið íþróttakennaranema frá Laugarvatni í gærkvöldi. Vörnin var að smella og menn að skora úr færunum sínum. Reyndar voru nokkuð mörg skot sem fór forgörðum en það er líka bara hluti leiksins. Ég sofnaði síðan bara nokkuð sáttur, því tengdó, hún Brynja lofaði mér að fara á bílnum í skólann…ekki á hverjum degi sem maður sleppur við að hlaupa eftir strætó um hálfa Reykjavík hugsaði ég.

Já ég vaknaði með bros á vör þennan morgun, stillti klukkuna hálftíma seinna en venjulega og ætlaði bara rétt að hlaupa í fötin, fá mér morgunmat og bruna á Atosinum í skólann. Allt gekk sem sagt eins og í sögu ég var á góðri leið með að komast í skólann á réttum tíma.

En nú byrjaði gæfan að snúa við mér baki, ég kem út úr blokkinni og sé að það búið að snjóa og bíllinn því kaldur. En það er nú ekki málið. Ég geng að bílnum og ætla að opna hann en lásinn er frosinn og er sama sagan með farþegahurðina og skottið…allt gjörsamlega gaddfreðið. Ég dó þó ekki ráðalaus því að ég hafði horft á fræðsluþættina sem VÍS var með í gamla daga og mundi hvernig karlinn í þeim þætti hafði sprautað lásaspreyi í lásinn og líka sett plastpoka með heitu vatni upp við skránna til að þýða hana. Þar sem ég átti ekki lásasprey fór ég aftur upp í íbúð og setti heitt vatn í poka og ætlaði að fara að rölta með það út þegar stórt gat kom á pokann, þar sem ég stóð í miðri íbúðinni tókst mér að dreifa vatni um stóran hluta íbúðarinnar. Ég mátti því þurka það upp með hálfbrunnar hendurnar sökum heita vatnsins sem frussaðis út allt. Eftir að hafa þurrkað allt upp með tveimur stórum handklæðum setti ég vatn í annan poka sem gaf sig ekki. Síðan stóð ég úti á plani með pokann upp við bílstjórahurðina í ca. 6 mín og ekki vildi hún þiðna þannig að ég reyndi við hurðina hinu megin í álíka langan tíma en hún gaf sig ekki heldur.

Ég gafst því upp á þeirri lausn og sótti hjólið mitt og ætlaði að kaupa lásasprey á næstu bensínstöð. Á meðan ég hjólaði af stað út í Shell þá geymdi ég skólatöskuna mína í hjólageymslunni því ég nennti nú ekki að vera með hana að óþörfu en þegar ég var kominn dáltið áleiðis þá rann það upp fyrir mér að peningaveskið var í skólatöskunni svo ég mátti snúa við og sækja það. Allt gekk síðan vel eftir þetta ég keypti spreyið sem svínvirkaði og ég ætlaði að fara upp og skila hjólinu í hjólageymsluna og ákvað að hafa bílinn í gangi á meðan að ég myndi hlaupa upp þá myndi hann verða fljótari að hitna. Það var hinsvegar ekkert rosalega snjallt því að húslykillinn var á sömu kippu og bíllyklarnir og því varð ég að tölta út í bíl aftur og ná í þá. Ég læsti síðan hjólinu og dreif mig síðan í skólann og er dagurinn búinn að vera ágætur síðan þá :)

Tags:

Djöfulsins andskotans …!!

19. febrúar 2004 in Blog, Handbolti | No comments

Maður er náttúrulega alveg að drepast úr leti, nennir ekki einu sinni að rugla eitthvað hérna á blogginu. En það kemur vor eftir veturinn eins og skáldið sagði og þá léttist nú heldur betur brúnin á manni. Nú er bara stefnan á að klára skólann svona um miðjan maí og halda þá til Akureyrar og fara að vinna í HörpuSjöfn. Stefnt er á að leigja sér íbúð og vera næsta árið.

Það sem mér dettur nú ekki mikið í hug núna, þá læt ég þetta bara gott heita að sinni.

Ég er jú að fara að keppa við íþróttakennara-nemana frá Laugarvatni í kvöld og verðum við að gjöra svo vel og vinna á okkar heimavelli. Landsfrægir dómarar munu dæma leikinn og vonum við að það eigi eftir að fullkomna leik okkar, en það eru Kári Garðars og Binni.

Upplifði alveg rosalega lífsreynslu í gær en þá fór ég til læknis að láta kíkja á fæðingarblett sem er á belgnum á mér…bara svona til að vera viss um að allt sé í gúddý. En svona húðsjúkdómalæknar svífast greinilega einskins…ég var sprautaður í blettinn með einhverju deifilyfi sem var greinilega ekki að virka því þegar læknirinn ætlaði að taka vefjasýni úr mér með einhverri magnaðri grægju við fyrstu sýn var hún greinilega ekki að virka heldur því hún ætlaði að ná að smella smá bút úr blettinum en það tókst ekki. Ég kvartaði aðeins og sagði henni að deifingin væri sennilega ekki að virka. En læknirinn var ekki að hlusta neitt á mig því hún tók sér töng í aðra höndina og skæri í hina og klippti bara smá bút úr blettinum. Maður reyndi náttúrulega að halda andlitinu en djöfull var þetta vont….helvítis andskotans læknar!!

En yfir og út meira seinna……..

Tags: ,

Jafntefli á Laugarvatni!

11. febrúar 2004 in Handbolti | No comments

Við keyrðum gallvaskir á Laugarvatn á mánudaginn en komum ekki eins spertir til baka. Gerðum jafntefli við lið sem við hefðum átt að vinna á venjulegum degi…er reyndar alveg að missa mig í trúnni á þetta lið og við höfum ekki unnið leik í háa herrans tíð, en það kemur að því fyrr en varir.

Leikur á morgun við ÍR2 sem eru efstir í okkar riðli í utandeildinni. Við munum sko ekkert gefa eftir og þeir skulu sko þurfa að hafa fyrir því ef þeir ætla sér að vinna. Gaman að sjá hvort maður hitti ekki á markið í þessum leik, manni veitti ekki af nokkrum skotæfingum og kirkjutröppuferðum hjá Jóa Bjarna svo maður fari að geta eitthvað. En vonandi fer þetta að ganga hjá okkur, við erum að verða meira en þreyttir á þessu :)

Tags:

Alveg á fullu í íþróttunum!

8. febrúar 2004 in Handbolti, Íþróttir | No comments

Ég er búinn að vera duglegur að reyna að hreyfa mig í þessari viku og nú er stefnan að koma sér í almennilegt form. Ég fór að lyfta á mánudag, keppti á miðvikudag í handboltanum við HR, fór svo á handboltaæfingu á fimmtudag, lyfti á föstudag og í dag sunnudag. Þannig að ég er helvíti ánægður með útkomu vikunnar og stefni á að fylgja þessu eftir næstu vikur svo maður komist í almennilegt form. Það er síðan leikur á morgun upp á Laugarvatni kl. 8 á staðartíma svo að það verður nóg að gera á morgun.

Tags: ,

« Older entries