» Handbolti

Norðurland – 2 dagar

Egill — Mon, 10 May 2004 10:11:00 +0000

Nú eru bara tveir dagar eftir að læra og svo próf á miðvikudaginn. Ætla að vera duglegur til að verða fimm, þá förum við Bragi bróðir í klippingu. Eru að spá í að vera í stíl í þetta skiptið, taka bara allt af en halda síddinni í hnakkanum. Sítt að aftan er alveg að gera sig í dag og ætlum við því að taka þetta alvarlega og safna í stert Það var ekki margt sem að ég gerði um helgina, þurfti að vinna í gær og síðan horfði ég á Haukana taka Valsmenn nokkuð létt í handboltanum í sjónvarpinu. Valur verður að fara að taka sig á svo að skoðannakönnun síðunnar muni koma með rétt úrslit. Allir sem hafa tekið þátt í henni hafa spáð Val sigri, það vona ég líka að þeir geri…en betur má ef duga skal! Ég og flugmaðurinn fórum í golf um daginn í elliðaárdalnum, fundum fínt svæði með gríni, sadngrifju og fínni brekku til að slá niður. Ég var eitthvað hægri sinnaður í sveiflunni því boltarnir fóru flestir í fallegu sveig lengst til hægri. Flugmaðurinn örvhennti var ekkert að hika við þetta og sló allar kúlurnar sínar svona líka mörghundruð metra. Held að hann sé kominn í rétta sportið…getur líka verið að öll þessi prófaþreyta hafi hjálpað honum og hann hafi séð höfuð kennara sinna í stað boltanna og bara látið vaða í þá. Jamm það var fínnt í golfinu en ég verð greinilega að fara að æfa mig betur ef ég ætla að halda í Tiger 2. Best að fara að læra núna, ég verð að skipuleggja tímann vel á lokasprettinum svo að hægt sé að brasa eitthvað í fluttningum með prófalestrinum.

Eitt próf búið og þrjú eftir!!!

Egill — Sat, 01 May 2004 14:10:00 +0000

Já nú er eitt próf búið, gekk ekki alveg eins og skyldi en það var svo sem ekkert sem kom mér á óvart…ákvað samt að mæta í prófið til að fá smá skell. Þá leggur maður harðar af sér í næstu próf. Ég þarf að læra í allan dag og fram á kvöld því ég er að fara að vinna í fjóra tíma á morgun…það lítur allt út fyrir það að ég komist ekki á KA-leikinn en ég sendi þeim strauma í gegnum sjónvarpið eða eitthvað. Jæja best að halda áfram að lesa örverufræðina…kveð að sinni.

Fyrsta prófið er á morgun…

Egill — Thu, 29 Apr 2004 13:32:00 +0000

Já nú er ballið að byrja, Lífmælingar eru á morgun kl. 9:00. Ég er búinn að reyna að læra eitthvað undir þetta og geri mér vonir um að ná…það þýðir ekkert annað en að vera bjartsýnn. Held að þetta verði samt frekar langur dagur og mikið pælt í fervikagreiningu og öðrum gullmolum sem þeir ætlast til þess að maður kunni. Síðan er bara að vona KA-mönnum gangi allt í haginn á heimavelli í kvöld. Áfram KA!! Ég held að þessi pása sé orðin fín, búinn að taka bloggsíðu rúntinn, skoða mogann og KA-síðuna. Þannig að maður er klár í að halda áfram að lesa.

Lestur og lestur…og út að hlaupa.

Egill — Mon, 26 Apr 2004 12:51:00 +0000

Góðan daginn, gaman að sjá að sumarið er á næsta leyti og skólinn styttist óðum. En til að ljúka skólaárinu þarf maður víst að taka próf og er það miður…því ég hef nú aldrei verið talinn vera mikill prófamaður, á það til að misskilja spurnigar og svara því sem mig langar til að svara…frekar en að svara því sem spurt er um Það má víst ekki, ekki gefur það hátt á prófi að rugla bara um daginn og veginn án þess að vita nokkurn skapaðann hlut hvað maður er að tala um. Þetta dugði reyndar í síðustu prófum en nú verður maður að einbeita sér og taka síðustu þrjár vikurnar með trompi og gefast ekki upp þó það blási á móti. Helgin var svona ágætt bara, ég fór í vinnuna báða dagana, en gat þó lært eitthvað báða dagana…hefði getað gert meira en maður býr alltaf til þessa djöfulsins pressu svo maður þarf að lesa í belg og biðu með adrenalín flæði í nokkra tíma. Les bara best undir pressu en ég á soltið mikið eftir núna svo að ekki þýðir að bíða fram á siðasta sólahring með þetta eins og oft hefur gerst í menntaskólanum. Það kemur að því að maður les eins og á að gera, allan veturinn og glósar með því. Ég og Birkir fórum og hittum félaga okkar í Þreyttum (utnadeildarliðinu okkar í handbolta) það var gaman að hitta strákana og fá sér 1-2 öllara. Birkir var á bíl að þessu sinni og nýtti ég mér það…hefur venjulega verið öfugt þannig að maður fær nú ekki mikið samviskubit yfir því Ég fór út að skokka áðan og tók nokkrar armbeygjur og magaæfingar…formið greinilega horfið, þetta litla sem var fyrir. Helvíti gott samt að fara í Elliðaárdalinn og fá smá frískt loft í lungun. Yfir og út…

Árshátíð í kvöld

Egill — Sat, 06 Mar 2004 13:57:00 +0000

Það verður glatt á hjalla í kvöld, fer á árshátíð líffræðiskorarinnar sem verður haldin í Versölum við Hallvarðarstíg…hvar sem hann er nú staddur?? Þetta verður vonandi fínt kvöld, við á 1. árinu byrjum á því að fara í partý til hennar Guðbjargar sem á heima í Garðabæ og síðan mun rúta sækja okkur þangað og keyra okkur í Versali. Það verður þriggja rétta máltíð og tónlist með matnum og ég veit ekki hvað og hvað. Maður er búinn að spara sig og peningabudduna lengi og engu eytt í djamm og fyllerí en það gæti eitthvað breyst í kvöld Heilsan er reyndar ekki alveg upp á það besta eins og er, en vonandi að maður komist í gegnum helgina án þess að þurfa að leggjast í veikindi. Þarf helst að mæta í vinnu á morgun líka og síðan get ég safnað kröftum fyrir komandi viku í skólanum. En ég segi bara eins og Birkir félagi GÆS (get ætla skal) og þá hlýtur maður að standa uppi fullur (a.m.k. í kvöld ) af orku á mánudaginn og fer að taka sig á í skólanum. Það er orðið allt of stutt í prófin og maður ekki almennilega byrjaður að lesa.

Þreyttir voru að spila síðasta fimmtudag við Víking 2. Við svöruðum fyrir okkur á heimavelli og unnum þá tiltölulega létt. Kallinn setti 7 slummur og hefur ekki skorað svona mikið í mörg ár örugglega og voru þau í öllum regnbogans litum og ekki furða þó maður sé kallaður kamelljónið á síðu Þreyttara.

Ég er að lesa efnafræði með öðru auganu hérna á milli þess sem ég sel viðskiptavinum magnaða liti á húsin þeirra. Ætla að halda aðeins áfram, á bara klukkutíma eftir af þessum vinnudegi. Yfir og út………

KA bikarmeistarar 2004!!

Egill — Sun, 29 Feb 2004 19:14:00 +0000

Þetta var bara góður leikur hjá KA og Fram í höllinni í gær, boltinn hraður og skemmtilegur. Ég vil óska öllum félögum mínum innilega til hamingju með sigurinn þetta var flott hjá ykkur!

Arnar Þór þetta var flottur leikur hjá þér líka þú varst bara óheppinn með lið að þessu sinni

Þreyttara gerðu í buxurnar á móti ÍR2 í dag og það stórt…hef ekki tapað svona stórt síðan ég byrjaði að æfa handbolta. En það kemur dagur eftir þennan dag, við höfðum þó gaman að þessu mest allan tíman. Meira seinna….

KA-Fram í dag í höllinni!!

Egill — Sat, 28 Feb 2004 12:31:00 +0000

Það verður enginn smá leikur í dag í Laugardalshöllinni þegar mínir menn í KA koma og etja kappi við Adda Sæ og Petja fyrrum KA-menn en þeir heita víst Frammarar í dag. Þetta verða hörkuátök og mikið að gerast inn á línunni þar sem verður eflaust hart barist. Ég er í vinnunni núna en ég ætla að drífa mig um leið og ég get og hvetja mína menn

ÁFRAM KA!!

Naglbítarnir klikka ekki!

Egill — Fri, 27 Feb 2004 08:35:00 +0000

Ég, Birkir og Björgvin fórum á helvíti netta tónleika í gær á Gauknum en þar voru 200.000 naglbítar að spila. Þeir voru bara djöfulli góðir að mínu mati í afbragðs formi þessa dagana. Þeir eru að fara að spila á Samfés í kvöld og vonandi gengur þeim eins vel þar og í gærkvöldi.

Dagurinn í dag hjá mér byrjar annars bara nokkuð rólega, ég ætla að fara í frumulíffræði kl. 9:30 og fara svo í ræktina. Síðan þegar ég er búinn að taka rosalega á því þar þá ætla ég að klára örverufræðiskýrslur og lífefnafræðiskýrslur. Kvöldið verður svo rólegt að ég held…horft á American idol og eitthvað.

Á morgun er svo vinna fram að bikarleiknum þar sem KA spilar við FRAM. Gaman verður að sjá Arnar Þór klást við gömlu félagana á línunni og vonandi eigum við eftir að sjá fjörugan leik þar sem engu verður til sparað. Nú nú…ekki var það mikið fleira í fréttum að sinni, ég vona að þið eigið góðan dag og ljúfa helgi.

ps. þeir sem að vita ekkert um Naglbítana ættu að kíkja á síðuna þeirra, smella hér til þess og ég lofa ykkur að þið finnið eitthvað áhugavert! Þó það væri ekki nema flott föt sem hægt er að panta á síðunni þeirra á vægu verði.

Djöfulsins andskotans …!!

Egill — Thu, 19 Feb 2004 18:45:00 +0000

Maður er náttúrulega alveg að drepast úr leti, nennir ekki einu sinni að rugla eitthvað hérna á blogginu. En það kemur vor eftir veturinn eins og skáldið sagði og þá léttist nú heldur betur brúnin á manni. Nú er bara stefnan á að klára skólann svona um miðjan maí og halda þá til Akureyrar og fara að vinna í HörpuSjöfn. Stefnt er á að leigja sér íbúð og vera næsta árið.

Það sem mér dettur nú ekki mikið í hug núna, þá læt ég þetta bara gott heita að sinni.

Ég er jú að fara að keppa við íþróttakennara-nemana frá Laugarvatni í kvöld og verðum við að gjöra svo vel og vinna á okkar heimavelli. Landsfrægir dómarar munu dæma leikinn og vonum við að það eigi eftir að fullkomna leik okkar, en það eru Kári Garðars og Binni.

Upplifði alveg rosalega lífsreynslu í gær en þá fór ég til læknis að láta kíkja á fæðingarblett sem er á belgnum á mér…bara svona til að vera viss um að allt sé í gúddý. En svona húðsjúkdómalæknar svífast greinilega einskins…ég var sprautaður í blettinn með einhverju deifilyfi sem var greinilega ekki að virka því þegar læknirinn ætlaði að taka vefjasýni úr mér með einhverri magnaðri grægju við fyrstu sýn var hún greinilega ekki að virka heldur því hún ætlaði að ná að smella smá bút úr blettinum en það tókst ekki. Ég kvartaði aðeins og sagði henni að deifingin væri sennilega ekki að virka. En læknirinn var ekki að hlusta neitt á mig því hún tók sér töng í aðra höndina og skæri í hina og klippti bara smá bút úr blettinum. Maður reyndi náttúrulega að halda andlitinu en djöfull var þetta vont….helvítis andskotans læknar!!

En yfir og út meira seinna……..

Jafntefli á Laugarvatni!

Egill — Wed, 11 Feb 2004 21:57:00 +0000

Við keyrðum gallvaskir á Laugarvatn á mánudaginn en komum ekki eins spertir til baka. Gerðum jafntefli við lið sem við hefðum átt að vinna á venjulegum degi…er reyndar alveg að missa mig í trúnni á þetta lið og við höfum ekki unnið leik í háa herrans tíð, en það kemur að því fyrr en varir.

Leikur á morgun við ÍR2 sem eru efstir í okkar riðli í utandeildinni. Við munum sko ekkert gefa eftir og þeir skulu sko þurfa að hafa fyrir því ef þeir ætla sér að vinna. Gaman að sjá hvort maður hitti ekki á markið í þessum leik, manni veitti ekki af nokkrum skotæfingum og kirkjutröppuferðum hjá Jóa Bjarna svo maður fari að geta eitthvað. En vonandi fer þetta að ganga hjá okkur, við erum að verða meira en þreyttir á þessu