Á morgun er Þorláksmessa og við bræðurnir sjáum ekki fram á að það verði nein skata í ár þar sem við erum að vinna og það gengur eitthvað brösulega að fá frí til að fara að borða hana. Við verðum því bara að bíta í það súra…nema eitthvað sérstakt komi upp á og þetta skötumál leysist. Annars er ég að fara að vinna frá 10-22 á morgun og verður það örugglega dáltið erfitt en maður hefur svo sem afrekað annað eins.

Kominn með út úr þremur prófum og er búinn að ná þeim öllum. Það þarf því bara að ná einu enn og þá eru námslánin trygg Það hlýtur að reddast hjá mér. Jamm það er ekki mikið meira að frétta nema að það kom þetta leiðindaveður í dag og er víst spáin ekki góð, bara stórhríð og læti. það verður fínt að vera heima og horfa á veðrið og er stefnan að liggja upp í rúmi og breiða yfir haus ef að jóladagur mun bjóða upp á þessa spá.

Annað að frétta er að ég var að vinna í dag og var Bragi mættur í vinnu í dag með mér. Það var afskaplega lítið að gera…Akureyringar átta sig örugglega ekki fyrr á Þorláksmessu að þeir eiga eftir að kaupa jólavínið og koma allir á sama tíma og kvarta yfir því að það sé alltaf allt of mikið að gera í ríkinu…þannig að komið bara fyrir hádegi á morgun eða hinn og þið losnið við traffíkina Þá höfum við líka aðeins meira að gera og dagurinn líður hraðar.

Jæja ætla að klára að skrifa jólakortin núna.

Vinnuplanið hjá mér er svona:

Laugardagurinn 18. des. (í dag) – 10:45-16:00
Sunnudagurinn 19. des. – FRÍ
Mánudagurinn 20. des. – 10:öö-18:00
Þriðjudagurinn 21. des. – 10:00-18:00
Miðvikudagurinn 22. des. – 10:00-19:00
Fimmtudagurinn 23. des. (Þoláksmessa) – 10:00-22:00
Föstudagurinn 24. des. (Aðfangadagur) – 8:45 – 12:00
Laugardagurinn 25. des. (Jóladagur) – FRÍ
Sunnudagurinn 26. des. (annar í jólum) – FRÍ
Mánudagurinn 27. des. – 10:00-18:00
Þriðjudagurinn 28. des. – 10:00-18:00
Miðvikudagurinn 29. des. – 10:00-18:00
Fimmtudagurinn 30. des. – 10:00-20:00
Föstudagurinn 31. des. – 8:45-13:00

Þetta verður stíft en okkur Kollu vantar pening og því dugar ekkert að kvarta undan þessu. Ég býst ekki við því að vinna eftir áramót þar sem ég þarf að læra undir próf í erfðafræði. En nú þarf ég að drífa mig í vinnuna

Annars er ég búin að laga alla þá tæknilegu örðugleika sem fylgdi því að skipta yfir í apple og hef ég ekki rekist á notendavænna stýrikerfi…enda ekki prufað neitt nema windows. Það eina sem hefur komið fyrir mig var að allar skrárnar sem ég flutti yfir úr gömlu lifebook urðu að “read only” og því gat ég ekki í fyrstu opnað gamlar skrár, breytt þeim og vistað þær aftur. Með því að breyta þeim öllum í “read and write” á svona 5 sekúndum get ég það. Þetta hefði aldrei gerst svona hratt í PC, hefði örugglega þurft að breyta hverri skrá fryrir sig og verið heila eilífð að því. Síðan passa ég mig á því að senda windows friendly póst og þá er það upptalið sem ég hef lent í vandræðum með í apple.

Úrslit könnunar er komin í ljós og niðurstöðurnar afgerandi, það ætla flestir á sem skoða þessa síðu að fara á Gagga rejúníónið og verður það gaman að sjá gamla félaga sem maður hefur ekki hitt í 5ár.

Á að mæta á 5ára “rejúníón” Gaggans?

Já að sjálfsögðu!! 42%
já ég held það?? 8%
Ég veit ekki 4%
Nei örugglega ekki 17%
Á ekki við um mig 29%

24 greiddu atkvæði…þeir sem lesa þetta og greiddu sitt atkvæði nokkrum sinnum til að skekkja niðurstöður eða bara kanna stöðuna þá vil ég benda ykkur á að það er hægt að kanna úrslit könnunar án þess að greiða fleiri atkvæði en eitt með því að ýta á “sjá niðurstöður” takkann sem er undir könnuninni. Þetta kerfi er gallað að því leyti að maður getur greitt endalaus atkvæði og þá er ekkert að marka könnunina.

Ég er því búinn að skella inn nýrri könnun og hver veit nema að maður skelli inn myndum þegar maður kemst í jólafrí. Jæja best að halda áfram að læra undir síðasta prófið í bili sem er á morgun klukkan 9…tek erfðafræðina 5. janúar.

Það er ekki átakalaust að koma draslinu inn í íbúðina sem við erum að fara leigja því hún er á þriðju í húsinu og þröngir og brattir tréstigar eru ekki til að hjálpa. Við reyndum að fara með bókahilluna mína upp í heilu lagi en hún komst engan veginn sökum þrengsla og því tókum við hana alla í sundur til að þetta gengi.

Í dag erum við að hugsa um að koma með ísskáp frá ömmu hennar Kollu og fylla hann af mat. Við þurfum því að taka vel á því, þar sem annar ísskápur er fyrir upp í eldhúsi en hann er með svo litlu frystihólfi að við erum að hugsa um að skipta honum út.

Það er afskaplega rólegt í vinnunni núna, Einar er í fríi þar sem hann er að keppa á Pollamótinu og Ævar skrapp að ná sér í sólgleraugu í Glerártorg því hann ætlar að fara til Spánar í tvær vikur.

Portúgalar spila við Grikki á EM, ég og Kolla erum að fara til Portúgal eftir 55 daga og erum diggir stuðningsmenn Portúgals. Það er alveg á hreinu að ég fæ mér nýja treyju með Figo þegar ég fer út. Keypti mér Zidane-treyju í Frakklandi og get ekki klæðst henni með sóma á næstunni.

Jamm ég er sem sagt á fullu að flytja þessa dagana og hef mjög gaman að því…við Kolla munum örugglega gera lítið annað um helgina en að koma okkur fyrir. Gef skýrlu um gang mála síðar…

Í gær fórum við Kolla í Eurovison-partý til Fanneyar og Arnórs. Þetta var ágætis skemmtun og fannst mér Úkraína bara með nokkuð gott atriði. Jónsi stóð sig vel en þetta lag gekk ekki núna, því það voru hressu og fjörugu lögin sem stóðu upp úr. Ég held ég fái mér smá kríu fyrir matinn, það á að grilla…amma og afi koma í mat. Ekkert betra en maturinn hérna í Espilundi 13 Vonandi hafið þið sunnlendingar það jafn gott og ég…maður finnur hvernig slakknar á manni að komast hingað norður stress og annar pirringur flýgur út í hafsauga þegar maður andar hreinu og tæru norðleska loftinu að sér.