Skólinn

You are currently browsing articles tagged Skólinn.

Fyrsta skóladeginum á nýja árinu lokið

11. janúar 2005 in BS-nám, Blog | No comments

Mætti í skólann á réttum tíma, svona til að gefa tóninn á nýju ári…mætti reyndar heldur snemma því að mér hafði yfirsést tilkynning sem kom á tilkynningarsíðunni í gær sem sagði að ónæmisfræðin sem átti að byrja klukkan átta í morgun byrjar ekki fyrr en í næstu viku ;(

Jæja ég hafði svo sem gott af því að mæta snemma, maður er búinn að liggja í leti fram undir hádegi síðustu daga. Ég tók meira að segja strætó í morgun svo tímalega var ég, þessir djöfuls strætóar eru verri en í Reykjavík ef eitthvað er…ganga bara á klukkutíma fresti og fara þessar líka svaðalegu krókaleiðir til að reyna hirða upp þessa tvo eða þrjá sem slysast til að villast inn í þá. Ég slapp svo sem vel á heimleiðinni því að mér var skutlað heim af Önnu Guðrúnu (Danke schöne Anna!!)

Annars er allt sama og venjulega, Kolla er á fullu í prófum og við fórum okkar vikulegu ferð í Bónus til að geta borðað eins og svín í heila viku ;) Við borðuðum pítsu áðan og bragðasit hún afbragðs vel þótt ég segi sjálfur frá ;)

Ég vona að þið hafið það gott á morgun í því sem þið eruð að gera…ég á að minsta kosti eftir að hafa það gott á morgun því ég er í fríi ;) Þarf reyndar að mæta til tansa þannig að það verður kannski ekki eins frábært og það gæti verið…vonandi verða ekki margar holur.

Tags: ,

Búinn í prófum í bili..

16. desember 2004 in Blog | No comments

Tók síðasta prófið í bili í morgun (fer í erfðafræðina 5. jan) með svona skítsæmilegum árangri miðað við að vera ólesinn. Er að fara að vinna á morgun rétt fyrir 10 þannig að maður byrjar ekki bara að liggja í leti um leið og maður kemst í jólafrí…neinei það þýðir ekkert! Ég fór með Kollu áðan í búðir og redduðum við 5 jólagjöfum …ekki slæmt það!

Núna er ég hins vega að fara að leggja mig í klukkutíma því ég er vægast sagt þreyttur svaf svona tvo tíma í nótt frekar en þrjá og er mikið að spá í að fara snemma að sofa í kvöld.

Meiri fréttir síðar

Tags:

sama sagan…

17. nóvember 2004 in BS-nám, Blog, Veður, Íþróttir | No comments

Lítið að frétta af mér…það er bara endalaus snjókoma og það er bara besta mál…því þá styttist í að ég komist á bretti Ég er búinn að reyna að vera duglegur í lærdómnum í dag en það er eins og ég komist ekki í gang fyrr en svona um miðjan dag og er orðinn góður þegar venjulegt fólk ætti að vera að fara að sofa. Þetta er mesti galli því að það verður oft allt of lítið úr deginum

Það gengur ekkert allt of vel með þessa helvítis ritgerð þannig að ég er búinn að vera að taka pásu á henni og gera önnur verkefni. Vonandi að maður fari langt með helvítið um helgina…þetta er að verða allt of mikill tími sem fer í þetta helvíti. Ég er svo góður í að velja mér einhver viðfangsefni sem að tekur heila eilífð að leysa. Ég er að fara taka smá syrpu í þessu og síðan ætla ég í ræktina klukkan sex og reyna aðeins við bekkinn svo Birkir fari ekki of kátur út úr ræktinni þegar við mætumst um jólin

Tags: , ,

snóar og snjóar…

11. nóvember 2004 in BS-nám, Blog, Veður | No comments

Það er kominn þessi líka fína snjókoma og er búin að vera síðan í morgun og jörðin orðin hvít aftur. Mér lýst betur á þetta, veðrið var farið að minna meira á apríl eða maí heldur en nóvember. Ég var svo lánsamur að fá far úr skólanum, Hannes og Una sáu um það…þau voru með þessa fínu hjólagrind á bílnum. Ég er sjálfur kominn með bíl til afnota næstu 11 daga því mamma er á leið til Frakklands og pabbi þarf ekki báða bílana á meðan…nema að hann leggi bara krúsanum, hann er nefnilega búinn að láta setja upp þessa líka svakalegu bílskúrshurð og hver veit nema að geymi djásnið bara inn í skúr á meðan mamma er úti.

Annars er allt gott að frétta af mér, var bara í verkefnavinnu í dag í skólanum og síðan er massa föstudagur á morgun, þ.e. erfðafræði og fiskalífeðlisfræði frá 10-18. Ég læt svo hendur standa fram úr ermum um helgina því að ég þarf að byrja á ritgerð sem gildir 30% og fleiri verkefnum. Maður bíður með að djamma með Döllunum og vinunum sem eru fyrir sunnan þar til að þeir koma norður um jólin. Hef enga trú á öðru en að það verði djammað þá líka. Gaman hefði verið að skreppa suður yfir heiðar en þá hefði ég heldur ekki gert neitt í lærdómnum sem ég verð að gera ef ég ætla mér að ná þessum blessuðum prófum.

Eyrún Gígja og Elmar Dan eru búin að eignast litla stelpu og óska ég þeim innilega til hamingju með það. Ég er núna að rústa Kollu í þessum keppnum um kyn á börnum, 2-0 (sagði að Þóra eignaðist strák og Eyrún stelpu en Kolla sagði öfugt við mig), þannig að ég tel mig nokkuð glöggann á þetta og ef þið eruð í vafa og viljið vita svona lagað þá hafið þið bara samband

Jæja ég er kominn með svaðalega strengi í axlirnar og get ekki pikkað mikið lengur….skemmtið ykkur vel um helgina!

Tags: ,

Verkefni og meiri verkefni…

3. nóvember 2004 in BS-nám, Blog | No comments

Ég er búinn að vera latur við að skrifa hér undanfarið, ég er alveg að drukkna í verkefnum og þá þýðir nú lítið að vera eyða púðri í einhverja heimasíðu.

Annars er allt gott að frétta, ég og Hannes Ingi erum búnir að fara þrisvar í ræktina og ég er allur að koma til. Síðan er eitthvað voða ball í Hlíðarbæ á föstudaginn, það er spurning að kíkja á það. Það er víst bjórkynning og partí á undan svo að það er nóg í boði ef mann langar til að vera á eyrunum. Held að ég verði nú bara rólegur í þessu, ef ég fer verð ég stilltur, maður var svo svaðalega fullur síðast með sunnan liðinu að maður er hálf ragur við að endurtaka leikinn

En best að halda áfram með erfðafræðina og fara svo í rúmið og safna kröftum…Gute Nacht!

Tags:

Heim í heiða dalinn…!

25. október 2004 in BS-nám, Blog, Hjól | No comments

Góða kvöldið gott fólk, ég er ekki búinn að skrifa lengi, enda búinn að vera önnum kafinn. Ég keyrði norður í gær með Kollu og vinkonum hennar. Maður var ekki alveg í besta formi til að keyra heim enda var tekið vel á því á laugardagskvödið…! Birkir sagði að ég hefði verið til vandræða í einhverjum stiga því ég hefði flogið á hausinn þar…veit nú ekki alveg hvað er til í því, veit bara að ég marinn á nefinu og man ekki hvenær það högg kom.

Ég vaknaði eldsnemma og fór að þvo þvott sem hafði safnast upp þá viku sem ég var fyrir sunnan, fór svo í skólann og hélt áfram að þvo og ryksugaði síðan íbúiðina á meðan Kolla eldaði. Síðan setti ég nagladekkin á hjólið áðan og er núna að verða klár í hvaða veður sem er á Gary Fisher

Best að fara að læra, ég þarf að gera slatta af verkefnum í þessari viku.

Tags: ,

Eru það Ýdalir á morgun??

3. júní 2004 in Blog, Hjól | No comments

Ég er búinn að vera alveg arfa slakur að skrifa á þessa bloggsíðu síðustu daga og eiginlega alveg síðan ég kom norður. Maður er bara alltaf að brasa eitthvað og er lítið í tölvunni svona á sumrin. Það er alltaf einhver ritstífla í mér þegar ég ætla að fara að skrifa hérna þannig að ég hætti yfirleitt við. Það er samt fínt að sjá að einhverjir nenna að kommenta á þetta í rugl í manni, þó maður nenni ekkert að skrifa á móti. Ég komst þó að einu í vinnunni um daginn að það var ekki mjög merkilegur árangur að hjóla upp í Hlíðarfjall á 36 mín, þó að klukkan hafi gengið í 5 mínútna pásunni, því að metið þarna upp eftir á víst einhver gönguskíðadrjóli sem er 23 mín. Þannig að nú verð ég aldeilis að fara að spýta í lófanna og hjóla nokkrum sinnum þarna upp og athuga hvort tíminn lagist ekki eitthvað. Annars er púnterað á hjólinu núna svo maður hjólar ekki mikið. Verð að gera við það á morgun. Önnur stórmerkileg frétt er að maður þarf að ná 5.5 í meðaleinkun í fimm hæstu áföngunum í Háskólanum til að komast á milli ára í líffræðinni. Þetta er bara gott mál því ég er búinn að ná því og er því heimilt að hefja annað ár í líffræðinni þegar þar að kemur. Ætla nú samt að taka nokkur próf aftur því það eru algjörar sultu einkunnir í sumum fögunum og ekkert gaman að hafa þær á einkunnaspjaldinu…maður náði þessu þó í bili, fegra svo einkunnaspjaldið síðar.

Já svo eru það Ýdalir á morgun, veit ekki alveg hvort ég fer…það kemur í ljós á morgun. Maður er orðinn svo gamall að maður passar ekki inn í þetta, eða hvað…ætla allir að mæta?

Ætla að fara að halla mér…sofið þið vel!

Tags: , ,

Eitt próf búið og þrjú eftir!!!

1. maí 2004 in BS-nám, Handbolti | No comments

Já nú er eitt próf búið, gekk ekki alveg eins og skyldi en það var svo sem ekkert sem kom mér á óvart…ákvað samt að mæta í prófið til að fá smá skell. Þá leggur maður harðar af sér í næstu próf. Ég þarf að læra í allan dag og fram á kvöld því ég er að fara að vinna í fjóra tíma á morgun…það lítur allt út fyrir það að ég komist ekki á KA-leikinn en ég sendi þeim strauma í gegnum sjónvarpið eða eitthvað. Jæja best að halda áfram að lesa örverufræðina…kveð að sinni.

Tags: ,

Fyrsta prófið er á morgun…

29. apríl 2004 in BS-nám, Handbolti | No comments

Já nú er ballið að byrja, Lífmælingar eru á morgun kl. 9:00. Ég er búinn að reyna að læra eitthvað undir þetta og geri mér vonir um að ná…það þýðir ekkert annað en að vera bjartsýnn. Held að þetta verði samt frekar langur dagur og mikið pælt í fervikagreiningu og öðrum gullmolum sem þeir ætlast til þess að maður kunni. Síðan er bara að vona KA-mönnum gangi allt í haginn á heimavelli í kvöld. Áfram KA!! Ég held að þessi pása sé orðin fín, búinn að taka bloggsíðu rúntinn, skoða mogann og KA-síðuna. Þannig að maður er klár í að halda áfram að lesa.

Tags: ,

Lestur og lestur…og út að hlaupa.

26. apríl 2004 in Blog, Handbolti, Hlaup | No comments

Góðan daginn, gaman að sjá að sumarið er á næsta leyti og skólinn styttist óðum. En til að ljúka skólaárinu þarf maður víst að taka próf og er það miður…því ég hef nú aldrei verið talinn vera mikill prófamaður, á það til að misskilja spurnigar og svara því sem mig langar til að svara…frekar en að svara því sem spurt er um Það má víst ekki, ekki gefur það hátt á prófi að rugla bara um daginn og veginn án þess að vita nokkurn skapaðann hlut hvað maður er að tala um. Þetta dugði reyndar í síðustu prófum en nú verður maður að einbeita sér og taka síðustu þrjár vikurnar með trompi og gefast ekki upp þó það blási á móti. Helgin var svona ágætt bara, ég fór í vinnuna báða dagana, en gat þó lært eitthvað báða dagana…hefði getað gert meira en maður býr alltaf til þessa djöfulsins pressu svo maður þarf að lesa í belg og biðu með adrenalín flæði í nokkra tíma. Les bara best undir pressu en ég á soltið mikið eftir núna svo að ekki þýðir að bíða fram á siðasta sólahring með þetta eins og oft hefur gerst í menntaskólanum. Það kemur að því að maður les eins og á að gera, allan veturinn og glósar með því. Ég og Birkir fórum og hittum félaga okkar í Þreyttum (utnadeildarliðinu okkar í handbolta) það var gaman að hitta strákana og fá sér 1-2 öllara. Birkir var á bíl að þessu sinni og nýtti ég mér það…hefur venjulega verið öfugt þannig að maður fær nú ekki mikið samviskubit yfir því Ég fór út að skokka áðan og tók nokkrar armbeygjur og magaæfingar…formið greinilega horfið, þetta litla sem var fyrir. Helvíti gott samt að fara í Elliðaárdalinn og fá smá frískt loft í lungun. Yfir og út…

Tags: , ,

« Older entries